Թումանեանական Հերոսներու Քանդակները Նոր Երանգ Պիտի Հաղորդեն Դսեղի Մէջ Թումանեանի Տուն-թանգարանին

Յովհաննէս Թումանեանի 150-ամեայ յոբելեանին ընդառաջ տասներկու քարէ եւ տասը փայտէ իւրայատուկ քանդակներ պիտի զարդարեն Դսեղի կեդրոնական հատուածը եւ Յ. Թումանեանի տուն-թանգարանի տարածքը: Կերպարները Թումանեանի ստեղծագործութիւններու յայտնի հերոսներն են` Անոյշը, Սարօն, Գիքորը, Քաջ Նազարը եւ այլք: Լրագրողները քանդակները տեսնելու եւ ատոնց հեղինակներուն հետ ծանօթանալու հնարաւորութիւն ունեցան Յուլիս 17-ին, Դսեղի մէջ:

«Քանդակներու հեղինակները երիտասարդ ստեղծագործողներ են Հայաստանի տարբեր մարզերէն, Արցախէն եւ Ջաւախքէն: Բոլոր կերպարները թումանեանական հերոսներ են, եւ ատոնք պիտի տեղադրուին Դսեղի կեդրոնական շրջանաձեւ այգիին, տուն-թանգարանին մէջ Դսեղը աւելի աշխուժացնելու եւ տարածքը գեղեցկացնելու նպատակով»,-«Արմենփրես»-ի հաղորդմամբ` նշած ՀՀ մշակոյթի նախարար Արմէն Ամիրեան:

Նախարարին խօսքով` թանգարանի տարածքին գտնուած ծառերը, որոնք վտանգ ներկայացուցած են կառոյցի համար, հատուած են եւ անոնց բուները օգտագործուած են փայտէ քանդակներու համար:
«Զարմանալի հեքիաթային մթնոլորտ ստեղծուած է, եւ մարդը կը ցանկայ երկար մնալ այստեղ: Կը կարծեմ, որ քանդակները նոր շունչ պիտի տան թանգարանին, համայնքին»,-շեշտած է Ամիրեան եւ աւելցուցած, որ նման ծրագիրներ պիտի իրականացուին նաեւ այլ մեծերու թանգարաններու տարածքին:

Leave a Reply

Your email address will not be published. Required fields are marked *

*